Rid i natt : roman

Omtale

Den svakt utrusta Jakop lever eit uverdig liv som svoltplaga grisegjetar ein stad på Sjælland. Kjensla av å vere eit heilt menneske får han først når foreldrelause Johannes kjem for å hjelpe han med grisane. Johannes står for trass, sjølvrespekt og oppfinnsemd og blir Jakops gode ven, heilt til kjøthentaren kjem og tek han med seg. Saknad og otte for venen får Jakop til å dra til København, der Johannes er hyra som leikekamerat til prinsen. Her kjem dei to ut for striden på slottet, der Struensee og andre driv spelet sitt. Jakop syner seg som ein handlekraftig kar og reddar kronprinsen unna tumultane. Men Johannes, som blir med han attende til griseflokken, kan ikkje gløyme den kongelege leikekameraten, og får etter kvart attende rollen sin på slottet. Spesielle evner gjer at Johannes får mykje tillit hjå kongen, men det er fullt av farar for den som tek del i maktkampen. Johannes vitjar Jakop med grisane, sjølv om han arbeider ved hoffet. Venskapsbandet som bind dei to saman ber den siste delen av boka, og når Johannes til slutt fell i unåde og vert skulda for brannstifting, står Jakop fram og tek på seg skulda. Til slutt slepper han likevel fri og erver garden han har tent på så lenge. Johannes blir ein mann utan heim og utan oppgåve i livet, og til slutt forsvinn han. Berre saknaden til Jakop er att som eit minne om han. Denne historiske romanen ser storhendingane gjennom auga til småkårsfolk. Forteljinga har framifrå språk og rytme og kombinasjonen av gode skildingar og personal synsvinkel gjer miljøet og tidsanden levande. Kjensler og stemningar kjem til uttrykk gjennom Jakops tenksemd og stille klokskap. Samlaget, 2001.