Kråke med akebrett og andre historier frå Naturtelefonen

Omtale

Det tok 15 år, men no er den endeleg klar: Boka med historier frå NRK Møre og Romsdal sitt populære innringingsprogram, Naturtelefonen. Her får lesarane forbløffande, rørande, triste og artige historier om ville og tamme dyr, fuglar, fiskar og sjødyr. Det er opplevingar frå folk sitt kvardagsliv før og no, historier frå fjøs og stall, frå fangst og fiske, frå jakt og friluftsliv, frå by og land. Til alle historiene har forfattaren tatt med oppklarande kommentarar frå dei tre faste ekspertane i Naturtelefonen: Ornitolog Alv Ottar Folkestad, dyrlege Olaf Birkeland og akvarist Jan Einarsen. Over hundre historier frå heile Møre og Romsdal er med, mange av dei fantastisk illustrert av teiknaren Trond Scheen Korssjøen. Det er programleiar for Naturtelefonen, May Britt Haukås, som har plukka ut og skrive ned historiene. Ho har lytta igjennom gamle opptak av programmet og skrive historiene slik dei vart fortalt i radioen. Ho har lagt vekt på å halde på den munnlege stilen, og sjølvsagt er namna på forteljarane med. Denne boka er ein skatt for alle naturinteresserte og dyreglade menneske, både vaksne og barn.