Guten med sølvhjelmen

Omtale

"Ho var ei gåve som Jon ikkje visste at han ynskte seg.", heiter det i Hanne Kvists danske vinnarbidrag til Nordisk barnebokkonkurranse. Jon fortel her om lillesystera, som plutseleg kjem inn i livet hans og treng han. Og andre enn han har ho ikkje i heile den underlege verda som boka skildrar. "Det gjekk ikkje meir enn fem månader, så selde dei henne", heiter det om foreldra. Godt at det finst andre vaksenfigurar som kan hjelpe Jon å finne systera att. Sans for detaljar i personskildringar og eit vakent barneperspektiv gjev lesaren høve til å kjenne seg att i denne halvt absurde fiksjonsverda, og forteljinga er fantasifull og spennande utan å spele på action- eller drama-verkemiddel. Poesien ligg kanskje like mykje i handlinga som i språket, og det er vanskeleg å leggje boka frå seg. Samlaget, 1999. 142 s.