Prosa og dikt

Omtale

Jon Fosse les eigne tekstar lydlagt av Karl Seglem i CD-boksen "Dikt og Prosa". Dobbelt-CDen er ei oppsummering av samarbeidet som har pågått mellom forfattaren Jon Fosse og musikar/komponist Karl Seglem i over 10 år. Boksen inneheld albuma "Prosa" frå 1996 (Isbn: 8292062114) og "Dikt" (Isbn: 828181009) som nyleg er ferdig innspelt. Klangane, fargane og pusten frå dei særprega fjord- og fjellandskapa i Sogn og Hardanger har set tydelege avtrykk i det dei to skapar. Dei siste ti åra har desse to kunstnarane etablert seg for eit stadig større norsk og utanlandsk publikum. Begge mottek overstrøymande kritikkar for sine arbeid og Jon Fosse er i dag ein av dei mest spelte dramatikarane i Europa. I 1996 gav komponist og musikar Karl Seglem ut CD.en "Prosa". Der les forfattaren Jon Fosse tekstar frå sitt forfattarskap i samklang med saksofonisten sine tonar. Utgjevinga fekk svært positive kritikkar og vart omtala som ei av årets vakraste CD-utgjevingar. Albumet "Dikt" (2006) er oppfølgaren til denne CD.en. På mange måtar arbeidar Fosse og Seglem med mykje av det same - på kvar sine felt. Dei står begge i det vestlandske. Begge innspelingane er eigne klangplassar der levande ord møter levande tonar. Prosa- og diktlinjene til Fosse og komposisjonane og improvisasjonane til Seglem smeltar saman til noko heilt eige. Ikkje mainstream dikt, ikkje mainstream jazz, ikkje mainstream folk - men Jon Fosse - Karl Seglem.