Tida flyg : historiske flyfoto frå Sogn og Fjordane ; basert på Johan Ottesens fotoarkiv

Omtale

Dette er ei bok om Sogn og Fjordane frå ei tid då Bru, Davik og Jostedal enno var eigne kommunar. Det var den gongen ferja gjekk frå Balestrand til Grinde, og Bergen var målet for dei fleste båtrutene. Enno fanst det ikkje ei gul stripe i fylket, knapt nok asfalt, og den lengste tunnelen var Allmenningsfjellet på 335 m. Fylket hadde 39 kommunar og Askvoll var større enn Førde, men folkerikast av alle var Kyrkjebø. Det var tida før handelshusa og dei flate taka, før bustadfelta, og før bilen tok over styringa av tettstadene våre. Sogn og Fjordane på 1950-talet var enno sjarmerande umoderne. Det var ei tid som for lengst er forbi, men som likevel lever i minnet til mange i dag. Tida flyg inneheld kring 300 flyfoto frå alle delar av fylket, dei fleste frå 1950-talet. Alle kommunar og alle tettstader er med. Her er grundige bilettekstar med eit vell av opplysningar. Bli med på ei flyferd gjennom Sogn og Fjordane, frå Selje i nordvest til Aurland i søraust, med den kjende NRK-mannen Ottar Starheim som reiseleiar. Ottar Starheim (f. 1946) er redaktør i NRK Sogn og Fjordane. Han har 40 års røynsle som avis- og kringkastingsmann. Starheim har laga talrike historiske radioprogram frå Sogn og Fjordane og har skrive fleire lokalhistoriske bøker, m.a. "Tunge tak" (2003). Han er forfattar av NRK Sogn og Fjordane sitt "Fylkesleksikon" på Internett.