Der er Gift paa Pennen hans : kampen i Stortinget om diktargasjane 1863-1962 : norsk kulturpolitikk 1814 - 2014

Omtale

Denne boka er ein studie av eit viktig kapittel i norsk litteraturpolitikk, ordninga med diktargasje, som eksisterte i perioden 1863-1962. Diktargasje var ei livstidslønn som Stortinget gav til utvalde diktarar, og i samband med løyvingar til kontroversielle forfattarar oppstod det konfliktar og strid i Stortinget. Kampen i Stortinget om diktargasjane hadde nær samanheng med allmenne politiske og kulturelle konfliktar i Noreg i det aktuelle tidsrommet, og eit gjennomgåande tema i desse konfliktane var motsetninga mellom kulturradikalisme og kristen verdikonservatisme. Denne konflikten var mest dramatisk og fekk vidtrekkande politiske konsekvensar i samband med den såkalla Kielland-saka i 1880-åra, men stridsbølgjene var nesten like høge da Øverland fekk diktargasje i 1938. Andre forfattarar som vekte strid var Kristofer Janson, Arne Garborg, Ingeborg Refling Hagen, Sigurd Hoel, Helge Krog og Aksel Sandemose. I tillegg til dei politiske motsetningane var det heile tida debatt om Stortinget var det rette organet til å dele ut lønn til diktarar og andre kunstnarar. Alle søknader om diktargasje som Stortinget hadde til behandling 1863-1962 er undersøkt, men boka legg mest vekt på å analysere dei sakene som skapte strid og som viser dei prinsipielle sidene ved den litteraturpolitiske modellen som låg til grunn for diktargasjane.